A do të bëhen republikane bluzat e bardha të Korçës

Nga  Erget Cenolli

Ka disa javë që Partia Demokristiane në Korçë organizoi  një aktiv në një prej sallave më të mëdha të qytetit. Pjesmarrja ishte e admirueshme për një parti, që nëpër procese elektorale kishte marrë vetëm disa qindarka. Njerzit, kur panë në televizjonet lokale, “boomin” demokristian mbetën të pataksur. Sekreti ishte shumë i thjeshtë: masa dërrmuese e pjesmarrësve ishin mjekë e mjeke(heqimë e heqime, siç i quante i ndjeri Faik Konica), ndihmësmjekë e ndihmësmjeke, infermierë, sanitarë etj. Kishin lënë punët e spitalit, vizitat nëpër ambulancat e lagjeve, kioskat-ambulanca të fshatrave e kishin mbushur sallën e kinemasë, aq sa të dukej se ishin vitet ’70 kur njerzit mezi prisnin, që në ekranin e madh të dilte Zhan Mare në rolin e D’Artajanit. Një “shtrengim dhëmbësh” nga drejtorët dhe drejtoreshat e drejtorive lokale në varësi të Ministrisë së Shëndetësisë dhe gjithë bluzat e bardha( natyrisht që bluzat i mbanin ndënë sqetull) ishin aty duke brohoritur për Partinë Demokristiane dhe liderin e saj Nard Ndoka. Askush nuk foli e të thoshte se, pacientët në spitalin e Korçës, edhe një shiringë duhet ta marrin nëpër farmacitë rreth e rrotull spitalit dhe se ambulancat e mjaft fshatrave janë nëpër kioska dërrase apo llamarine, këto s’kanë rëndësi. E rëndësishme ishte që të binin në sy të liderit demokristian që kishte në dorë emërimet dhe ç’emërimet. Kjo e bëri liderin Ndoka të besonte e proklamonte se alternativa demokristiane po njihte një zhvillim të pa parë, në një qytet si Korça ku gjysma janë ortodoksë të betuar e gjysma myslimanë të zellshëm.

Tani kohërat ndryshuan; ministri Ndoka e braktisi karrigen ende pa u shkarkuar prej Kryeministrit.

Po me anëtarësinë e mjekëve çdo të ndodhë vallë?! Kthyen qetë, ktheu dhe qerrja- thotë fjala e urtë popullore. Alternativa republikane është një alternativë serioze dhe mjaft me reputacion, pastaj edhe shumë nga mjekët kanë ishprona që presin me vite t’i marrin e s’i marrin dot, tani edhe atyre iu  erdhi rasti tek dera, pse të mos e shfrytëzojnë.  Vetëm pacientët e gjorë pyesin: A do të furnizohen spitalet me barna!? Këtyre iu rekomandojmë të lexojnë Aleksandër Dymanë (birin) që thotë: “Gjithë urtësia e botës përmblidhet në dy fjalë: Prisni dhe shpresoni!”