Zhvillohet spektakli magjik “Mis Korça 2008”

Fituese 17 vjeçarja Lorela Tuke

Korçë- Fundviti i ftohtë në këtë prag festash ka gjetur “shërimin” e tij gati magjik në juglindje. Është pikërisht vajza më e bukur  e qytetit të serenatave e cila rezatoi në skenën e teatrit “Andon Zako Cajupi”. “Mis Korça 2008” është spektakli më pikant dhe më i madhi i fundvitit në qytetin juglindor, i sjellë ndryshe dhe pas tre vjetësh shkëputje. E humbur tre vjet më parë kurora e Mis Korçës, mbriti më e bukur se kurrë në këtë eveniment, për të vezulluar në kokën e 17 vjeçares Lorela Tuke. Spektakli i bukurisë për  të arritur në finalizmin e tij pati një rrugë megjithëse të shkurtër prej afro një muaji tepër të vështirë. Stafi realizues i tij u përball me tabutë tradicionale të mbyllejs së bukurisë prapa dyerve dhe kangjellave korçare pse jo, por edhe të ndonjë shkolle të qytetit nga drejtuesit e saj. Pas përzgjedhjes së 35 bukurosheve arritën në finale 15 prej tyre, duke u shfaqur më të bukura se kurrë në natën finale të spektaklit. Konkursi ishte një show i vërtetë ku përmes 5 sfilatave me veshje të ndryshme nga klasikja deri në kostumet e banjove bukuroshet shpalosën sharmin  e tyre fizik të gërshetuar me inteligjencën. Midis sfilatave spektatori shijoi edhe pjesë të ndryshme artistike të interpretuar nga aktorë dhe këngëtarë të njohur. Momente emocionuese sollën në skenë një mini sfilatë nga vogëlushët e kopshteve të qytetit. Merita kryesore e këtij spektali i shkon shoqatës “Kryefamiljarja” e cila ishte inisiatorja e këtij eventi që zgjoi interesin e gjithë korçarëve. Duke qënë  një shoqatë në shërbim të gruas dhe duke patur në qëndër të saj lidhjen nënë-bijë solli në skenë idenë e madhe se çdo nënë lind dhe rrit bukuri të tilla si ato që mahnitën Korçën në këtë fundviti. Realizimi i këtij spektakli erdhi me produksionin dhe skenarin e shkrimtares dhe gazetares së njohur Irena Vreto, ndërsa asistent producent aktori Xhon Baka. E veçanta e Mis korça 2008 ishte drejtimi i shkëlqyer i gazetares Albana Çakshiri e cila u shfaq ndryshe. Megjithëse për herë të parë në skenë Çakshiri u prezantua si një drejtuese profesioniste jashtë gjithë steriotipeve dhe imazheve që po mërzitin spektatorin.  Prezantuesja kishte hequr xhinset dhe atletet e reporterit me të cilat përshkon rrugët e kronikës së rajonit, për të sjellë në skenë pjesën femërore më të mirë të një vajze korçare. Në magjinë e skenës korçare u ngjitën dhe vëllezërit e njohur Stefi dhe Endri Prifti të cilët kanë rrëmbyer duartroktije të pandërprera nga publiku. Realizimi i këtij spektakli u organizua me mbështetjen e bashkisë së qytetit, ndërmarjes së ujësjellës-kanalizimeve, firmës Beton Plus dhe unversitetit Kristal. Juria vendoi të shpallë fituese Mis Korça 2008 gjimanzisten Lorela Tuke, shoqëruese e parë e saj u shpall Ertemjona Mejdani, ndërsa vend i shoqërueses së dytë i takoi Helana Sarollit. Nuk kanë munguar në këtë spektakël dhe çmime të tjera si Mis Fotozhenia, Mis Serenata, Mis Media etj,. Fituesja e kurorës së bukurisë Tuke për vitin 2009 do të jetë edhe imazhi i bashkisë së qytetit.